مسيحيين مصر بدأوا الاحتفال بأسبوع اللآلام، اللي بيعتبر أقدس 7 أيام في الكنيسة القبطية، وفيهم بيقضي السيد المسيح آخر أيامه على الأرض قبل مجيئه الثاني. الأسبوع بدايته فرحة ومنتصفه حزن ونهايته فرحة تاني. تعالوا نتعرف على الأيام المختلفة في الأسبوع ده، وإزاي الأقباط المصريين بيحتفلوا بيها بطريقتهم التقليدية.
أحد الشعانين
أحد الشعانين أو حد السعف زيّ ما بيتقال عليه في مصر، وهو ذكرى دخول السيد المسيح لمدينة القدس واستقبال أهلها له بالسعف والزيتون زيّ الملوك، وده بعد إحياءه “لعازر”، اللي كان عيان وتوفى إثر مرضه من أربعة أيام، وسافر يسوع لمنطقة العيزرية، وهناك وعلى مرأى من الآلاف أقام “لعازر” من الموت.
أيام البصخة الثلاث
بمجرد بدء أسبوع الآلام بتمنع الصلاة على الموتى في الكنائس، وعلشان كده بيحرص الأقباط على حضور طقس التجنيز العام. وخلال أيام البصخة المقدسة مش بيكون في بخور في الكنائس وبتنتشر الشارات والستائر السوداء في حزن على صلب المسيح.
خميس العهد
خميس العهد هو ذكرى العشاء الآخير اللي اجتمع فيه السيد المسيح بتلاميذه لآخر مرة، ووصاهم برسالته ووعظهم بالحب. بالإضافة لده، خميس العهد هو ذكرى خيانة يهوذا ليسوع المسيح في مقابل ثلاثين قطعة من الفضة.
الجمعة العظيمة
ذكرى صلب السيد المسيح، اللي فيها خرج يسوع حامل صليبه لتل الجلجثة، بعد ما تآمر عليه حكام اليهود، وسلمه يهوذا للرومان.
سبت النور
في سبت النور، بيُعقد قداس إلهي في يوم السبت في معظم الكنائس في الغرب والشرق، وبيتم استقبال النور اللي بيخرج من كنيسة القيامة في القدس، ودي بتكون نهاية أسبوع الآلام.
أحد القيامة
في أحد القيامة أو عيد القيامة بيحتفل أقباط مصر بقيام المسيح من الموت وعودته للحياة، وبيعتبر العيد ده هو أعظم الأعياد وأكبرها عند المسيحيين، وبينتهي معاه الصوم الكبير وبتتلوه فترة الخماسين المقدسة.
