أغاني حابين نسمعها: الكينج في فيلم استعراضي جديد وميدلي من أغاني أم كلثوم

ألبوم الكينج محمد منير “باب الجمال” اللي نزل منه أغاني مؤخرًا حقق نجاح كبير، اللي يليق بموهبته وتاريخ الكينج العظيم.. فمنير حرفيًا أي حاجة بيعملها بتكون ناجحة والكل بيبقى مستنيها بفارغ الصبر.. ولو انت من الناس اللي بتستنى أغاني وأعمال جديدة لمنير، إحنا عندنا خبر حلو أوي علشانك! صرح منير بإنه بيحضر لفيلم استعراضي غنائي جديد، لإن الأعمال السينمائية اللي من النوع ده في مصر قليلة، فتخيلوا لما نحضر فيلم استعراضي من نوع مختلف.. ويكون اللي بيطربنا فيه بأغاني مختلفة هو الكينج نفسه!

والأخبار الحلوة مابتقفش هنا، فقال منير كمان إنه بيحضر لـ “ميدلي” جديد من أغاني الراحلة أم كلثوم، اللي هيكون مدته نص ساعة بيغني فيها منير أحلى ما غنت أم كلثوم، ووضح منير إن السبب اللي خلاه يفكر يعمل ده هو نشر الوعي وتثقيف الأجيال الجديدة فنيًا عن قامات كبيرة زيّ أم كلثوم وعبدالحليم وغيرهم من الفنانين الكبار في الغناء. وبصراحة بعد ما سمعنا الخبر ده، ماقدرناش نمنع نفسنا في إننا نفكر، إيه ممكن تكون الأغاني اللي هنحب نسمعها لأم كلثوم بصوت محمد منير؟

القلب يعشق كل جميل

انت عمري

فات الميعاد

حب إيه

حيرت قلبي معاك

أنا في انتظارك

آخر كلمة: قولولنا في التعليقات حابين تسمعوا إيه لأم كلثوم بصوت منير!

تعليقات
Loading...
Tweet
Share
Share
Pin