أعشاب مجهولة المصدر: القبض على أحمد أبو النصر “طبيب الكركمين”

مباحث المصنفات أصدرت أمر بالقبض على الصيدلي أحمد أبو النصر، المعروف بـ “دكتور الكركمين”، الأعشاب مجهولة المصدر اللي إعلاناتها انتشرت على التليفزيون بشكل كبير، وكان بيزعم إنها بتعالج الأمراض المزمنة، وإن الجسم بحاجة ليها لفوائدها اللي مالهاش حصر، وهي في الأساس عشب مجهول المصدر وغير معتمدة من الجهات الرسمية، وبالفعل تم القبض عليه والتحفظ على كمية من المضبوطات.

للأسف دي مش أول واقعة نسمع فيها عن دكتور، أو حتى شخص بيدعي مهنة الطب، وبيروّج لمنتج مجهول المصدر وبيدّعي إنه علاج لأمراض بيعاني منها شريحة مش قليلة من المصريين، وللأسف عدد مش قليل من الناس بيصدقهم وبيجربوا المنتجات دي خصوصًا عند الترويج بإنها “طبيعية”.. أوقات بتيجي سليمة ويكتشف المريض إن المنتج مالوش أي فاعلية، وأوقات للأسف بيحصل ضرر أو أمراض كمان من المنتجات دي.

بعد القبض عليه، اتنشرت قصة مريض اتعالج بالكركمين وحصل له مضاعفات، وبيقول المحامي محمد الخلاف، دفاع أحد المتضررين، تفاصيل تضرر موكله الوصفات المجهولة اللي قدمها له أبو النصر. إن موكله اشترى الكركمين، على اعتبار إنه مادة مسكنة للآلام، إلا إن أبو النصر، أعطاه بعض الأدوية، واللي تسببت في حدوث إجهاد للمعدة والكلى والكبد لموكله.

تم القبض على الصيدلي على خلفية تقدم سيدة ببلاغ اتهمت خلاله أبو النصر بالنصب عليها وإيهامها بقدرته على علاجها، وبيعه منتجات ووصفات طبية مجهولة المصدر وغير معتمدة من وزارة الصحة المصرية، لكنها اكتشفت ده بعد فترة زمنية من عدم فاعلية العلاج.

آخر كلمة: ماتفوتوش قراءة: عالجه بعلاج خرافي: اتهامات باغتيال الطبيب المعالج للإعلامي وائل الإبراشي

تعليقات
Loading...
Tweet
Share
Share
Pin