أعرف إزاي توصل مشروعك الصغير لناس أكتر مع مبادرة هاني عادل على السوشيال ميديا..

أغلب أصحاب المشاريع سواء صغيرة أو كبيرة عانوا بشكل كبير اقتصاديًا في الشهور اللي فاتت بسبب ظروف فيروس الكورونا اللي أثرت علي اقتصاد العالم كله. وزي ما الكورونا قصرت بالسلب واتسببت في غلق مشاريع متوسطة وصغيرة كتيرة، في شخصيات عامة كتيرة ومؤسسات اجتماعية ابتدوا يستخدموا حساباتهم الشخصية على السوشيال ميديا علشان يدعموا المشاريع دي، ويوصلوهم لعدد أكبر من الناس بدون أي مقابل.

ومن آخر الناس اللي بادرت بدعم المشاريع والمنتجات المحلية، الفنان هاني عادل اللي قام بالاحتفال بعيد ميلاده السنة دي بشكل مختلف، ونشر علي حسابه الخاص علي الإنستجرام مقطع فيديو بيقول فيه إنه هيعمل دعايا للمشاريع الصغيرة ومتناهية الصغر لمدة أسبوع كامل على صفحاته الشخصية على الفيسبوك والإنستجرام كدعم لأصحاب المشاريع دي، على أمل إنه يساعدهم يقفوا علي رجليهم من جديد.

كل اللي هيبقي مطلوب من أصحاب المشاريع اللي هيبعتوله هو إنهم يعملوا بوسترات فيها معلومات كافية عن مشروعهم، وهو هينشرها للناس على صفحته الشخصية. وبالإضافة لمبادرة هاني عادل، ظهرت في الفترة الآخيرة مجموعة متنوعة من الهاشتاجات ووسائل الدعم لأصحاب المشاريع والمنتجات المتوسطة والصغيرة زي حملة #حب_المحلي على الفيسبوك اللي بتساهم في توجيه اهتمام العامة لصناعة بلادهم المحلية، وعرض منتجات المشروعات الصغيرة في الشرق الأوسط.

آخر كلمة: فخورين بكل المبادرات اللي بتساعد غيرها إنهم يقفوا علي رجليهم من تاني!

تعليقات
Loading...
Tweet
Share
Share
Pin