جدل كبير أتسبب فيه مرتضى منصور، رئيس نادي الزمالك، بعدما طالب بضرورة إلغاء الموسم الحالي من الدوري المصري الممتاز ببسبب تجنب إرهاق اللاعبين، وهو السبب اللي يبان غريب، بس في الواقع ممكن يكون في أسباب تانية ورا الدعوة دي هنحاول نعرفها ونعرف ردود الفعل على الدعوة دي.
كلام مرتضى منصور
كالعادة فاجيء منصور الكل بتصريحات إعلامية طالب فيها بإلغاء الدوري، وقال إن لو في حد عاقل، لازم ننهي الدوري دلوقتي، وندي فرصة للاعيبين علشان يرتاحوا قبل بداية الموسم الجديد في أغسطس الجاي.
وصحيح فعلًا هنا نأكد إن لاعبي الدوري المصري بيتعرضوا للإرهاق نتيجة تلاحم المواسم، فمن المقرر إن الموسم الحالي من المسابقة ينتهي في أغسطس الجاي ويبدأ الموسم الجديد بعد فترة قصيرة، إلا إن دعوة مرتضى منصور بالإلغاء مش طبيعي برضه نشوفها في أي مكان في العالم، ده غير إن دي ممكن تكون الأسباب المعلنة بس وفي أسباب تانية.
الصراع مع الرابطة
دخل المستشار، مرتضى منصور، في صراع مع أحمد دياب، رئيس رابطة الأندية المصرية المحترفة، في أول موسم تدير فيه المسابقة، وبقى في أزمة بين النادي والرابطة. وأعلن الزمالك في بيان رسمي مقاطعة رابطة الأندية، وفي حال إلغاء الدوري، هيحقق النادي انتصار معنوي على الرابطة بغض النظر عن أسباب الإلغاء المعلنة.
الأهلي طبعًا
الأهلي بيقرب من صدارة جدول ترتيب الدوري المصري على حساب الزمالك، وده إذا فاز في ماتشاته المؤجلة، وده اللي بيفسر مطالبة مرتضى منصور بإلغاء المسابقة السنة دي، بحسب عدلي القيعي، مدير التعاقدات السابق بالأهلي.
عدلي القيعي قال في تصريحات على قناة الأهلي إن دايمًا الأمر مرتبط بمصالح صاحب الدعوة، وأضاف إن الأهلي عنده مؤجلات لو حقق فيها الفوز هيتصدر جدول الترتيب، حاليًا بيحتل الزمالك المركز الأول في جدول ترتيب الدوري بشكل مؤقت برصيد 48 نقطة من 22 مباراة، متفوق بفارق 4 نقاط بس عن الأهلي، صاحب المركز التالت، وفي حال قدر الأهلي يكسب في مبارياته التلاتة، هيتصدر المسابقة بفارق 5 نقاط عن الزمالك.
عبد الحفيظ يدخل علي الخط
كالعادة دخل بقوة على الخط سيد عبد الحفيظ، مدير الكرة بالنادي الأهلي، اللي قال إن إلغاء الدوري مش وجهة نظر، ووصفه بالفكر الفاسد اللي مش بيحصل في أي دوري في العالم.