أسباب من غير حلول: أنت ليه سنجل؟

في احتفالات وقلوب حمراء بتملى أرجاء العالم كله الشهر ده، لو أنت مش مرتبط والوقت ده بيعدي عليك بأسئلة كتير من نوعية “لما أكبر مين هيرعاني” و”لما أعيا مين هياخد باله مني” وما إلى ذلك.. حابين نيجي النهارده نكمل عليك ونسألك أنت ليه سنجل لحد دلوقتي؟

ماتخافش، مش هنسأل السؤال ونسيبك لدماغك، هنفكر معاك إيه اللي ممكن يبقى واقف بينك وبين قصص الحب اللي في الدنيا دي، علشان بعد المقال ده تخرج تعرفلك صاحب أو صاحبة، علشان اللي حبسك خلاص هنموته في المقال.

اتلسعت من الشوربة وبتنفخ في الزبادي

يعني ببساطة حد عقدك في حياتك ومن بعده بتطلع العقد دي على باقي الناس اللي بتحاول تكون معاك، حتى لو هما كويسين، فأنت مش بتشوف الحلو اللي فيهم، وفورًا عُقد الماضي بتكلبشك وتخليك تاخد حذرك منهم وماتدخلش في أي علاقة.

في هذه الحالة، بننصحك ترمي الشوربة اللي اتلسعت منها وتعامل الزبادي بمعاملته علشان ماتفضلش متعقد، عيش وجرب وسيب الحب ياخد مجراه.

بقيت أنت الريد فلاج

ودي بقى مختلفة شوية عن الحالة اللي فوق بس السبب مشترك، بمعنى إنك بتتعقد من علاقة سابقة كانت مع شخص مؤذي أو توكسيك بلغتنا المعروفة، بس بدل ما تنفخ في الزبادي بقيت أنت الشوربة خلاص، بقيت أنت الريد فلاج اللي الناس مفروض تهرب منك.

وفي الحالة دي الموضوع كبر وخرج عن السيطرة، ولازم تتخلص من الأذى اللي تأصل في شخصيتك نتيجة التجارب السابقة وترجع جرين فلاج تاني، علشان الحياة لا تحتمل المزيد من الريد فلاجز والأشخاص التوكسيك، ولو الموضوع فعلًا كبير، ماتترددش تتطلب مساعدة أخصائي نفسي.

أنت مغناطيس خوازيق

في الحالة دي، بننصحك تتعلم من أخواتك اللي فوق دول شوية بدل ما أنت جايبلنا الكلام. ببساطة شديدة أنت ممكن تبقى مابتتعلمش من غلطاتك، فبتكررها تاني بحذافيرها وبتسيب الناس تأذيك، ولما ييجي حد يكرر معاك نفس السيناريو، مفروض تبقى اتعلمت بقى لكن لا، بتسيبه يكرر نفس السيناريو وسبحان الله بتزعل وتاخد الضربة في قلبك تاني، مع إنك اتعرضت لها هي هي قبل كده بس أنت مغناطيس مابتتعلمش.

نصيحتنا: امسك العصاية من النص، ماهو مش يا إما تنفخ في الزبادي يا إما تفضل تكرر غلطاتك يعني، ماتسمحش لحد يغفلك ولو شميت ريحة الخازوق من بعيد اهرب في الوقت المناسب وانفد بجلدك.

بتخاف من الكوميتمنت

دي بقى منتشرة بقالها شوية وبقى معترف بيها خلاص، وهي إنك تبقى شخص بتخاف من المسؤولية والالتزام والارتباط بقى من بابه، بترفض تدخل في أي علاقة علشان خايف من اللي جاي، ولما حد بيلمح لك حتى بمشاعره بتجري، أسئلتك مالهاش نهاية وخايف تربط نفسك بحد، والحقيقة تعددت أسباب الخوف من المسؤولية بس النتيجة واحدة.

ببساطة هننصحك بحاجة صغيرة، احنا بنعيش كام مرة؟ جرب ولو ماحصلش نصيب عادي يعني مش نهاية العالم، بس ندمك لو ماجربتش هيبقى أسوأ بكتير من ندمك لو جربت وفشلت، أهو على الأقل تبقى حاولت ومشيت ورا مشاعرك.

قضاء الله وقدره

وده بقى خلاص آخر سبب، حاجة مش هنعترض عليها. لو مالقتش نفسك في الأسباب اللي فوق دي يبقى ده قضاء ربنا واستنى عدلك، ربنا يكرمنا ويكرمك ونعوض في الفلانتاين الجاي.

آخر كلمة: جبنالك أسئلة من غير حلول؟ بس اقترحنا نصيحة يا صابت يا خابت.. لو كنا لقينا حلول كنا نفعنا نفسنا.