أحمد مالك بيتصدر البوستر الرسمي للفيلم الأسترالي “حارس الذهب” اللي هيشارك في مهرجان الجونة اللي جاي

حلم كل فنان مصري أو عربي عنده طموح، هو مشاركته في أفلام عالمية علشان يوصَل للعالم كله إن الموهبة العربية لا يستهان بها، ويخلي أهل بلده يفتخروا بيه. ومع إن دي من أصعب الحاجات على أي ممثل مهما كان متميز في أدائه وأدواره إنه يوصلها، لكن الفنان الشاب أحمد مالك قدر يحجز مكان لنفسه في صفوف الممثلين العالميين من خلال مشاركته الدولية الأولى في الفيلم الاسترالي حارس الذهب.

عن: انستجرام

نزل إمبارح البوستر الرسمي لفيلم حارس الذهب اللي من إخراج وتأليف روديك ماكاي. وبيضم الفيلم نخبة من نجوم أستراليين كبار زي ديفيد وينهام، وجاي راين، وماهيش جادو، وبايكالي جانمبار، وتريفور جاميسون والممثل العراقي أسامة سامي. وبتتمحور قصة الفيلم حول راعي جمال أفغاني عايش في نهاية القرن الـ 19 في أستراليا وبيحاول يرجع لبلده، ولكنه بيلاقي نفسه مضطر إنه بيشارك حطاب بيحاول يهرب بسبائك ذهبية مختومة بختم الملك. وخلال الفيلم بيحاول الثنائي إنهم يهربوا من الشرطة ويزيلوا ختم الملك من سبائك الذهب.

وكان اتعرض الفيلم لأول مرة في مهرجان فينيسيا السينمائي الدولي واللي نال الإعجاب عالمياً ولقى ردود أفعال إيجابية من الجمهور والنقاد، خصوصًا على أداء أحمد مالك المتميز اللي مدحوا كتير من المجلات العالمية، منهم مجلة سكرين دايلي اللي كتبت “مالك خاطف للأنظار في دور حنيف”. وكان نشر مالك أول شهر أكتوبر صورة للفيلم وعبر عن تحمسه لمشاركة الفيلم في مهرجان الجونة السينمائي واللي بكده هيكون بيتعرض للجمهور المصري لأول مرة.

وبعد ما نشر امبارح مالك البوستر الرسمي للفيلم، الكل بقى مستني يتعرض الفيلم بفارغ الصبر في مهرجان الجونة السينمائي اللي هيبدأ من 23 أكتوبر الجاري لحد يوم 31. دي بتُعتبر خطوة كبيرة مش بس في حياة مالك الفنية، ولكنها خطوة مهمة للفن المصري بشكل عام لأنها بتسلط الضوء على الموهبة المصرية وبتدي أمل في إن فرص دولية كتير تتفتح للمثلين الصاعدين في مصر.

آخر كلمة: فخورين بمالك ومستنيين نشوف الفيلم بفارغ الصبر في مهرجان الجونة!

تعليقات
Loading...
Tweet
Share
Share
Pin