أحلى دويتوهات الدراما اللي شوفناهم في مسلسلات رمضان 2021

مفيش شك إن الموسم الرمضاني ده فعلًا أذهلنا وأمتعنا من حيث القصص الهادفة، والشخصيات ثلاثية الأبعاد لإنها واقعية مُركبة وكمان الوجوه الجديدة اللي أخدت فرصتها في إبراز موهبتها واللي احنا متأكدين إنهم فعلًا هيكونوا نجوم المستقبل والجيل الجديد. ومن الحاجات اللي أخدنا بالنا منها وكان لازم نتكلم فيها، هي الكيميا العالية اللي كانت واضحة على شاشة التلفزيون بين بعض الممثليين والفنانين في المسلسلات السنة دي، واللي نتمنى إن ده مايكونش آخر اجتماع وتعاون بينهم في عمل فني! تعالوا نشوف أحلى الدويتوهات اللي شهدها سباق رمضان 2021..

أمينة خليل وريم عبدالقادر – خلي بالك من زيزي

أكيد الاتنين دول لازم يكونوا أول ناس في القائمة مش كده؟ الكاريزما بتاعة الشخصيتين زيزي وتيتو وعلاقتهم مع بعض مالهاش منازع وفعلًا كانوا من أجمل الدويتوهات اللي شوفناهم في رمضان، ونفسنا نشوفهم مع بعض تاني في عمل قريب لإنهم وحشونا من دلوقتي!

تامر محسن ومحمد فراج – لعبة نيوتن

دول ماكانوش دويتو شوفناه بطريقة مباشرة على شاشة التلفزيون، ولكن خليط رائع بين مؤلف ومخرج بنظرة رائعة في تأليف الشخصيات زيّ تامر محسن، وممثل بموهبة محمد فراج قدر يجسد رؤية المخرج بطريقة أبهرت المشاهدين كلهم.

يسرا وأروى جودة – حرب أهلية

دويتو غير متوقع ولكنهم فاجأونا مفاجئة حلوة في المسلسل لما شوفناهم متحدين مع بعض وقريبين لدرجة إن أروى جودة اتجوزت باسل الخياط مخصوص علشان تاخد ليسرا حقها منه! ومانقدرش ننكر إن مشهد انتقامهم منه خلانا عايزين نشوفهم مجتمعين دايمًا مع بعض في الأعمال التلفزيونية.

يحيي الفخراني ومحمد محمود – نجيب زاهي زركش

ممكن تستغربوا من الدويتو ده، بس شخصية “نجيب” صاحب القصر والمساعد أو زيّ ما بنقول مدير المنزل “طريف” فعلًا من ألطف العلاقات اللي شوفناها، لإنها واقعية ومفيهاش مبالغة أو عرض صورة فيها perfectionism بين علاقة صاحب البيت والمساعد اللي في كتير من الأوقات بتكون بعيدة عن أرض الواقع. وبرغم إن طريف طماع وعايز يكون ليه أي نصيب من ثروة نجيب اللي بيبعترها شمال ويمين. بس في النهاية، الخناقات والهزار اللي بنشوفه مابينهم فعلًا بيضحكنا.

كريم عبدالعزيز وأحمد مكي وماجد الكدواني – الاختيار 2

علشان الختام يكون مسك، لازم نختم بالثلاثة الكبار دول. هما مش دويتو ولكن ثلاثي خطير، الكيميا بين كل واحد فيهم استثنائية واجتماعهم هما الثلاثة في لوكيشن واحد كان طبيعي يطلع لنا تحفة فنية زيّ مسلسل الاختيار 2..

آخر كلمة: مين تاني حبيتوهم مع بعض في مسلسلات رمضان السنة دي؟ شاركونا أفكاركم في التعليقات، ومتفوتوش قراءة “6 أنواع مختلفة من الجرائم الزوجية شوفناها في مسلسلات رمضان 2021“…

تعليقات
Loading...
Tweet
Share
Share
Pin