في أفلام اتعملت قبل كده في الوطن العربي واتكلمت عن ذوي الاحتياجات الخاصة وعن معاناتهم والمشاكل اللي بيتعرضوا لها بسبب اختلافهم، زيّ فيلم التوربيني، وقصة حلم حياتي من مسلسل إلا أنا، وفيلم الكيت الكات، والشموع السوداء، وتوت توت، والصرخة. بعيدًا عن إن كل الممثلين اللي أدوا الأدوار قدروا إنهم يعبروا عن مشاعر ومعاناة ذوي الاحتياجات الخاصة بصدق، بس لما يتعمل فيلم عنهم ويبقى هما فيه الأبطال، تفتكروا ازاي ده ممكن يختلف وتبقى خطوة إيجابية؟
أبطال هو فيلم سعودي من بطولة ذوي الاحتياجات ومجموعة من الممثلين، منهم ياسر السقّاف مذيع برنامج «ذا فويس» وفاطمة البنوي، وقصته من الفيلم الأسباني Campeones، بس المؤلفين مرام طيبة ووائل السعيد عملوا تعديلات في القصة علشان تناسب المُشاهد العربي. فكرة الفيلم ماجتش لفريق العمل بسبب إن النسخة الأسبانية نجحت بس، لأ ده اللي شجعهم كمان إن فريق كرة القدم السعودي من ذوي الاحتياجات قدروا إنهم يحققوا البطولة أربع مرات في المسابقة الدولية لكرة القدم، فالفيلم كان بمثابة تكريم لهم. وبعد ما اتعرض في مهرجان البحر الأحمر السينمائي، هيتعرض في صالات السينما في السعودية خلال الأيام اللي جاية.
الفيلم عمل صدى كبير والناس شجعت فكرة تمكينهم في مجالات مختلفة زيّ الشغل والرياضة والتمثيل وغيره، وخصوصًا التمثيل لإنهم أصدق وأوقع ناس يقدروا يعبروا عن حالتهم الخاصة واختلافهم، وفعلًا ده اللي حصل وردود الفعل على أدائهم كانت إيجابية ومبهجة، والممثلين أدوا الأدوار بخفة ولطافة. على الرغم إنه مصنف فيلم كوميدي، بس شايل رسايل ومعاني كتير وصلوها أبطال الفيلم.
بس كان في بعض التحفظات لأهالي وأسر ذوي الاحتياجات، لما ظهر في الفيلم إن مدرب الفريق مُهمل وكان مقصر في شغله، واتعين مدرب لفريق لذوي الاحتياجات الخاصة. وده اللي سَبِب غضب عند البعض. بس عكس التحفظ اللي اتاخد عن الفيلم، القصة بينت قد إيه هما قدروا إنهم يغيروا في شخصية المدرب بالطاقة اللي عندهم وإبداعهم وشخصياتهم المميزة وبرائتهم. كل ده كان سبب في تغيير المدرب للأحسن وعرف معنى الحياة الحقيقي، وهي دي كانت رسالة الفيلم، وماكانش هيعرف أي حد يوصّل الرسالة دي غيرهم هما.
أخر كلمة: ماتفوتوش قراءة: الرحلة: أول فيلم أنيميشن سعودي بمشاركة يابانية